RHCSA-EX200/Praktiki Suallar, Nəzəri Biliklər, Praktiki Həll Yolları və Müzakirələr. Sual #1

Salam dostlar,

Bu və növbəti praktiki məqalələrimdə "RHCSA-EX200" imtahanında düşə biləcək bəzi sualların həllini, sual və həll zamanı istifadə olunan əmrlər haqqında olan bəzi nəzəri bilikləri, eləcə də (ehtiyac yarandığı təqdirdə əgər hər hansı bir sual yaranarsa) müzakirəsini təqdim edəcəm. Qeyd edim ki, təqdim edəcəyim (qarışıq) nəzəri, praktiki sualların, imtahandakı praktiki suallarla 100 faiz eynilik təşkil etməsi anlamına gəlmir. Sadəcə olaraq məqsədim həmin nəzəri, praktiki sualların təyinatını anlamaq və cavabları əzbərləməklə deyil, məntiqi həll yolu ilə icra etməklə, imtahana düşə biləcək bu tipli sualların həllini həyata keçirməkdir. Beləliklə:

• Prakitki Sual 1

"/etc/testfile" faylından "abcde" və "abcdefgh" olan sətirləri tapın və həmin sətrləri "/tmp/testfile" faylına yazın;

Həll yolu:

Qeyd edim ki, həll yolları müxtəlif ola bilər, lakin imtahan müddətini nəzər alaraq ən ideal və vaxt qazandıran həll yolu həyata keçirilməlidir ki, həmin həll yolunu təqdim edirəm: İlk öncə "etc" qovluğunda olan "testfile" faylını "cat" əmrini icra etməklə oxuyuruq:

Daha sonra isə sualın şərtinə uyğun olaraq "grep abcde /etc/testfile > /tmp/testfile" əmrini icra etməklə verilən tapşırığın öhdəsindən gəlmiş oluruq;

Məqalənin məzmununda istifadə olunan əmrlərlə bağlı bəzi Nəzəri Biliklər:

"etc" - "Linux"-da əhəmiyyətli sistem tənzimləmələri (konfiqurasiya) fayllarını özündə saxlayan əsas qovluqlardan (directory) biridir və bütöv adı "etcetera" olan bu söz ingilis dilindən tərcümədə "və s. və ilaxır" anlamını ifadə edir. Bəzi mənbələrdə bu söz "Linux"-da "editable text configuration" olaraq da adlandırılır.

"tmp" - "temporary" sözünün qısaldılmış formasıdır və müvəqqəti qovluq və faylların saxlandığı qovluqdur (directory).

"cat" - əmri "concatenate" anlamını ifadə edir və qovluq (directory) deyil, yalnız fayl məzmunun oxunmasını təmin etməklə yanaşı, eləcə də fayl yaradılması və bir faylda olan məzmunun digər bir fayla ötürülməsini də təmin edə bilir;

"cd" - əmri bütöv olaraq "change directory" deməkdir və qovluqlar (directory) üzrə gəzintini təmin edir.

"ls -l" - əmri qovluqlarda (directory) yer alan faylların listini vertikal şəkildə görüntüləyir;

"grep" - əmri "global regular expression print" anlamını ifadə edir və müntəzəm ifadə, sətrlərdə olan mətn fayllarının axtarışı və uyğunlaşdırılmasını təmin edir;

">" - (single output redirection) fayllarda məzmun dəyişikliyini həyata keçirən yönləndirmə və ya istiqamətləndirmə simvolu hesab olunur və faylda əvvəlki sətrləri silərək yeni sətrin əlavə edilməsini (overwrite) təmin edir.

Müzakirə:

Sual: Müəmmalı qala bilər ki, praktiki sualın şərtində "abcde" və "abcdef" sətirlərini tapmaq və digər qovluğdakı fayla yönəltmək tələb olunduğu halda, praktiki sualın həlli prosesi nə üçün yalnız bir əmri icra etməklə həyata keçirildi?

Cavab: Yuxarıda qeyd etdiyim ki, imtahan müddəti zamanla tənzimləndiyi üçün ən uzun həll yolu deyil, ən qısa həll yolunu fikirləşmək lazımdır. Belə ki, "testfile" adlı faylımızda hərfləri əhatə edən sətrlər alt-alta qeyd olunmuşdur ki, "abcde" və "abcdefgh" sətrlərini ayrı-ayrı sətrlərdə yazmaqla, hər sətr (abcde və abcdefgh) üçün əlavə əmr yazmağa ehtiyac qalmır və yuxarıda tətbiq edilmiş əmr vasitəsilə (grep abcde /etc/testfile > /tmp/testfile) sualın şərtini ödəyən qısa həll yolu həyata keçirilmiş olur.

Dostlar,

Dostlar, fikrimcə bu praktiki məqaləm maariflənməniz üçün faydalı olar.

Təşəkkür edirəm və hər birinizə uğurlar arzu edirəm!

Hörmətlə,

Müəllif

Araz Əhmədov